Azərbaycan İnvestisiya Holdinqi (AİH) ilə Türkiyə Sərvət Fondu (TSF) investisiya sahələrində müştərək imkanları dəyərləndirmək məqsədilə strateji əməkdaşlığın təməlini qoyublar. İstanbulda keçirilən mərasimdə Anlaşma Memorandumunu AİH-in Baş icraçı direktoru Ruslan Əlixanov ilə TSF-in Baş direktoru və İdarə Heyətinin üzvü Arda Ermut imzalayıblar.
Anlaşma Memorandumu ilə tərəflər ilk növbədə Azərbaycan və Türkiyə olmaqla, qarşılıqlı razılıq əldə olunacaq digər ölkə və bazarlarda strateji əhəmiyyət kəsb edən sektorlarda investisiya imkanlarının birgə qiymətləndirilməsi və ortaq layihələrin hazırlanması istiqamətində əməkdaşlıq etmək niyyətlərini bəyan ediblər.
Əməkdaşlıq çərçivəsində qurumlar hüquqi, maliyyə, texniki və əməliyyat sahələrində məlumat və təcrübə mübadiləsinin artırılmasını, birgə investisiya imkanlarının dəyərləndirilməsini və korporativ səviyyədə uzunmüddətli strateji əməkdaşlığın gücləndirilməsini hədəfləyir.
Tərəflər, həmçinin bazar tendensiyalarının paylaşılması və tənzimləyici proseslərə dair fikir mübadiləsinin aparılması məqsədilə müntəzəm təmas və məsləhətləşmə mexanizmləri yaratmağı planlaşdırırlar. İmzalanan Anlaşma Memorandumu Türkiyə ilə Azərbaycan arasındakı güclü qardaşlıq bağlarının və strateji tərəfdaşlığın korporativ müstəvidə daha da inkişaf etdirilməsinə yönəlmiş birgə yanaşmanı nümayiş etdirir. Bu sənəd hər iki qurumun ortaq investisiya hədəflərini dəstəkləyir və gələcəkdə reallaşdırıla biləcək layihələr üçün əməkdaşlıq çərçivəsi formalaşdırır.