Azərbaycan İnvestisiya Holdinqi (AİH) və Efiopiya İnvestisiya Holdinqi (EİH) arasında strateji əməkdaşlığın qurulması və təşviq edilməsi məqsədilə Anlaşma Memorandumu imzalanıb. Sənəd AİH-in Baş icraçı direktoru Ruslan Əlixanov və EİH-in Baş icraçı direktoru Bruk Taye tərəfindən 14 fevral tarixində Efiopiyanın paytaxtı Əddis-Əbəbə şəhərində imzalanıb.

Memorandum tərəflər arasında strateji əməkdaşlıq perspektivlərini, o cümlədən birgə müəssisələrin yaradılması və qarşılıqlı maraq doğuran investisiya layihələrinin həyata keçirilməsini, portfel şirkətlərinin fəaliyyət göstərdiyi sahələrdə birgə texniki və iqtisadi tədqiqatların aparılmasını əhatə edir.

Əməkdaşlıq çərçivəsində həmçinin, hər iki holdinqin tətbiq etdiyi korporativ idarəetmə modeli, portfel şirkətlərində tətbiq olunan Əsas Səmərəlilik Göstəriciləri (ƏSG) və mükafatlandırma mexanizmləri ilə bağlı qarşılıqlı təcrübə mübadiləsi ilə yanaşı AİH tərəfindən yaradılmış Vahid İnformasiya Sisteminin EİH və idarəetməsində olan dövlət müəssisələri üçün tətbiqi istiqamətində addımların atılması nəzərdə tutulur.

2021-ci ildə təsis edilmiş, Afrika qitəsinin ən böyük suveren dövlət fondlarından biri olub, hal-hazırda idarəetməsində cəmi aktivləri təxminən 45 milyard ABŞ dollarına bərabər olan EİH-in Efiopiyanın əksər böyük dövlət müəssisələrini əhatə edən 40 portfel şirkəti mövcuddur. EİH-in əsas məqsədi dövlət müəssisələrinin səmərəli fəaliyyətinin təmin edilməsi, infrastruktur, enerji, kənd təsərrüfatı və texnologiya kimi əsas sahələrdə strateji investisiyalara fokuslanaraq, ölkənin uzunmüddətli iqtisadi inkişafını dəstəklənməsindən ibarətdir.